ধ্বংসস্তুপত পৰিণত ম্যানমাৰ, বেংকক

প্ৰকৃতিৰ ৰোষত দুখন দেশ । ম্যানমাৰত ভূমিকম্পৰ বিধ্বংসী ৰূপ । ভূমিকম্পৰ তীব্ৰ জোকাৰণিত কঁপি উঠিল বেংকক আৰু ম্যানমাৰ চহৰৰ ডাঙৰ ডাঙৰ অট্টালিকাবোৰ । ছ’চিয়েল মিডিয়াত ভাইৰেল হৈ পৰিছে ইয়াৰ ভিডিঅ’। ভাইৰেল ভিডিঅ’টোত চিঞৰ-বাখৰ কৰি ৰাজপথত দৌৰা দেখা গৈছে সকলোকে। শুকুৰবাৰে ম্যানমাৰত সংঘটিত হোৱা ৭.৭ প্ৰাবল্যৰ ভূমিকম্পৰ কম্পন থাইলেণ্ড পৰ্যন্ত অনুভূত হৈছিল। ভূমিকম্পৰ বাবে থাইলেণ্ডত জাৰি কৰা হৈছে জৰুৰীকালীন অৱস্থা। ব্যাহত হৈ পৰিছে বিমানসেৱা। থাইলেণ্ডত এটা অট্টালিকা খহি প্ৰায় ৪৩ জন লোক সন্ধানহীন হয় । জানিব পৰা মতে নিৰুদ্দেশ হোৱা অধিকাংশ লোকেই শ্ৰমিক অট্টালিকা নিৰ্মাণৰ কামত নিয়োজিত হৈ থকা লোক। ভূমিকম্পৰ ফলত বেংককত ১৫ জন লোকৰ মৃত্যু হৈছে বুলি স্থানীয় সংবাদ মাধ্যমত প্ৰকাশ পাইছে। ভূমিকম্পৰ কম্পন ইমানেই বেছি আছিল যে বেংককৰ দৰে দূৰৈতো ইয়াৰ জোকাৰণি অনুভূত হৈছিল। ম্যানমাৰৰ ছাগাইঙৰপৰা ১৮ কিলোমিটাৰ দূৰত্বত ১০ কিলোমিটাৰ গভীৰতাত এই ভূমিকম্পৰ অভিকেন্দ্ৰ। দুঘণ্টাৰ ভিতৰতেই তিনিটাকৈ ভূমিকম্পই জোঁকাৰি যায় দুয়োখন দেশ । এতিয়ালৈ ভূমিকম্পত হোৱা ক্ষয় ক্ষতিৰ পৰিমাণ জানিব পৰা হোৱা নাই যদিও দুয়োখন দেশতেই বিস্তৰ ক্ষতি সাধন হৈছে বুলি জানিব পৰা গৈছে । ভূমিকম্পৰ ফলত দলং ভাঙি যাতায়ত ব্যাহত হোৱাৰ লগতেই অট্টালিকাসমূহৰ ওপৰত থকা চুইমিং পুল সমূহৰ পানী তললৈ বৈ পৰা পৰিলক্ষিত হৈছে। অৱশ্যে ভূমিকম্পৰ পিছতেই সাহায্য আৰু উদ্ধাৰৰ কাম ক্ষীপ্ৰতাৰে আৰম্ভ কৰা হৈছে।